BDU-nun İctimai Nəzarət Şurasının üzvləri və jurnalistlər imtahan sessiyasının gedişini izləyiblər
Bakı Dövlət Universitetinin (BDU) İctimai Nəzarət Şurasının üzvləri və media nümayəndələrinin iştirakı ilə payız semestrinin imtahan sessiyasının gedişatı izlənilib.
Əvvəlcə BDU-nun İctimai Nəzarət Şurasının iclası keçirilib.
Rektor Elçin Babayev Şura üzvlərinə universitetdə ötən il ərzində həyata keçirilən işlər və yeniliklər barədə məlumat verib. Qeyd edib ki, 2024-cü ildə BDU dünya və regional reytinqlərdəki mövqeyini əhəmiyyətli dərəcədə gücləndirib, qlobal akademik gücünü daha da artırıb. İl ərzində BDU həm beynəlxalq, həm ölkədaxili əməkdaşlığı genişləndirib. Bununla yanaşı, yeni tədris və elmi-tədqiqat laboratoriyaları yaradılır, infrastruktur yenilənir.
Elçin Babayev Şura üzvlərinə imtahan sessiyasının gedişi ilə bağlı da məlumat verib. O, əvvəlki illərə nisbətən şikayətlərin və köçürmə hallarının azaldığını bildirib. Qeyd olunub ki, sessiyanın gedişinə operativ nəzarət, tələbələrin biliyinin qiymətləndirilməsində şəffaflığı təmin etmək məqsədilə İmtahan Qərargahı və Apellyasiya Komissiyası yaradılıb.
Sonra İctimai Nəzarət Şurasının üzvləri və jurnalistlər imtahana nəzarət otağında prosesi müşahidə ediblər.