DİN yanında İctimai Şuranın üzvləri şəhid ailələrini ziyarət ediblər
Bu gün Daxili İşlər Nazirliyi yanında İctimai Şura üzvləri Azərbaycan Polisinin peşə bayramı ilə bağlı Azərbaycanın ərazi bütövlüyü və təhlükəsizliyinin qorunması zamanı şəhid olan Daxili Qoşunların hərbi qulluqçularının ailələrini ziyarət ediblər.
Avropa.info xəbər verir ki, İctimai Şura adından Əliməmməd Nuriyev, Xalid Kazımov, Mahirə Əmirhüseynova və Rauf Zeyni Daxili Qoşunların Xüsusi Təyinatlılarının hərbçiləri olan Sahib Məmmədov və Faiq Həsənovun ailə üzvləri ilə görüşüblər.
Görüşlərdə Vətən Müharibəsində qəhrəmanlıq göstərən Sahib Məmmədov və Faiq Həsənovun döyüş yolundan, ölkəmizin təhlükəsizliyi üçün xidmətlərindən danışıblar.
Şura üzvləri torpaqlarımızın işğaldan azad edilməsi uğrunda qəhrəmanlıqla həlak olan şəhidlərimizin ailə üzvlərinin problemləri ilə maraqlanıblar.
Qeyd edək ki, Daxili Qoşunların Xüsusi təyinatlısı Sahib Yaşar oğlu Məmmədov 19 oktyabr 2020-ci ildə Füzuli rayonu, Faiq Hüseyn oğlu Həsənov isə 05 oktyabr 2020-ci ildə Cəbrayıl rayonu uğrunda gedən döyüşlərdə qəhrəmanlıqla şəhid olub.